សម្ល-ខគ្រឿងត្រីល្អិត
នេះគឺជាមុខម្ហូបមួយ ដែលបានយកមកតាំងបង្ហាញនៅពិធីបង្ហាញម្ហូបអាហារខ្មែរកាលពីល្ងាចមិញនេះ នៅស្តង់ខេត្តស្វាយរៀង ឯពហុកីឡដ្ឋានជាតិអូឡាំពិក រៀបចំឡើងដោយ អង្គការដើម្បីភាពញញឹមនៃកុមារ។ គ្រាន់តែស្តាប់ឈ្មោះ អ្នកប្រហែលជាគិតថា ម្ហូបនេះយកត្រីទៅខជាការស្រាច់ ក៏ប៉ុន្តែអ្នកស្វាយរៀងមិនបានធ្វើអញ្ចឹងទេ។ ចុះ គេធើ្វម្ហូបនេះយ៉ាងម៉េចទៅវិញ?
អ្នកគ្រូ អូប សុគន្ធនារតី ជាចុងភៅប្រចាំស្តង់ខេត្តស្វាយរៀង និងជាអ្នកខេត្តស្វាយរៀងផ្ទាល់ បានប្រាប់ឲ្យដឹងថា ម្ហួបនេះជាអាហារដែលអ្នកស្វាយរៀងនិយមបរិភោគ ហើយអ្នកខេត្តស្វាយរៀងណាក៏ស្គាល់ពីម្ហូបនេះដែរ។ ម្ល៉ោះហើយ ទើបអ្នកគ្រូសម្រេចលើកយកម្ហូបនេះមកតាំងបង្ហាញ ជាតំណាងឲ្យខេត្តស្វាយរៀងតែម្ដងទៅ។
អ្នកគ្រូដដែលបានបន្ថែមថា គ្រឿងផ្សំម្ហូបនេះសុទ្ធតែងាយស្រួលរក ព្រោះប្រើគឿង បន្លែ និងសាច់ក្នុងស្រុកទាំងអស់។ អ្នកគ្រូបានបញ្ជាក់ថា ម្ហូបនេះគ្មានរសជាតិផ្អែមដូចជាខនោះទេ។ ប៉ុន្តែមូលហេតុដែលដាក់ឈ្មោះបែបនេះ ក៏ដោយសារតែអ្នកស្វាយរៀងគេនិយមហៅម្ហូបនេះថាជាខ។
អ្នកគ្រូ នារតី មានពន្យល់ពីរបៀបចម្អិនថា ដំបូងត្រូវយកស្លឹកគ្រៃ (ទាំងគល់ និងស្លឹក) រមៀត ខ្ទឹមស រំដេង ហាន់ ហើយបុកបញ្ចូលគ្នា។ កូនត្រី និងកំពឹសត្រូវយកទៅចំហុយឲ្យឆ្អិនសិន រួចយកទៅប្រឡាក់គឿង ហើយដាក់អំបិល ស្ករ ប៊ីចេង និងច្របាច់ក្រូចឆ្មារ។ បន្ទាប់មកយកទៅដាក់ក្នុងឆ្នាំងចំហុយឲ្យដាច់ទឹក រួចដួសដាក់ចានយកស្លឹកម្រះព្រៅ និងស្លឹកក្រូចសើចរោយពីលើជាការសេ្រច។
សម្រាប់ការទទួលទានម្ហូបនេះ ចាំបាច់ត្រូវមានអន្លក់ខ្ចី ផ្ទាប់ជាមួយផង ទើបជម្រុញឲ្យរសជាតិកាន់តែឆ្ងាញ់។
យ៉ាងណាដែរ ម្ហូបអ្នកស្វាយរៀងមួយមុខនេះ? បើចង់ទៅភ្លក់រសជាតិផ្ទាល់ តោះទៅស្តង់របស់ខេត្តស្វាយរៀងល្ងាចនេះ នៅពហុកីឡដ្ឋានជាតិអូឡាំពិកទាំងអស់គ្នា។
Post a Comment