ចៀន-បាយលីងលាក់មុខ
គ្រឿងផ្សំ៖
បាយ ប្រេងឆា សាច់ជ្រូក ថ្លើមជ្រូក ផ្សិតចំបើង សាច់ក្រក ប៉េងប៉ោះ ខ្ទឹមបារាំង ស៊ុតទា គល់ខ្ទឹម ខ្ទឹមស ស្លឹកជីវ៉ាន់ស៊ុយ អំបិល ទឹកត្រី ទឹកខ្មេះ ស្ករស ទឹកស៊ីអ៊ីវ ម្សៅស៊ុប ម្ទេសប្លោកស្រស់ សាឡាដ។
វិធីធ្វើ៖
1 ពន្លះសាច់ជ្រូក ហាន់ជាបន្ទះស្ដើងៗតូចល្មមប៉ុនៗគ្នា ថ្លើមជ្រូកឆូតទទឹងៗ សាច់ក្រកហាន់បញ្ឆិតស្ដើងៗ ខ្ទឹមបារាំងហាន់បណ្ដោយវែងៗ ផ្សិតចំបើងពុះជាបួន គល់ស្លឹកខ្ទឹមកាត់ខ្លីៗពុះជាពីរ។
2 ដាំខ្ទះចាក់ខ្លាញ់ទុកឱ្យក្ដៅ ដាក់ស៊ុតទា (វាយឱ្យបែក) ក្រលែងឱ្យស្ដើងទុកឱ្យឆ្អិន ទើបដួសមកដាក់ហាន់ជាសរសៃឆ្មារៗ ម្ទេសប្លោកស្រស់ពុះជាពីរ ឆ្កីះគ្រាប់ចេញ ហាន់ជាសរសៃឆ្មារៗដែរ ច្របល់ជាមួយនឹងស៊ុតទាដាក់ចានទុកមួយអន្លើ។
3 ដាំខ្ទះចាក់ប្រេងឆាទុកឱ្យក្ដៅ ដាក់ខ្ទឹមស ចិញ្ច្រាំបំពងឱ្យឈ្ងុយ ហើយដាក់បាយ អំបិលម៉ដ្ឋ ប៉េងប៉ោះ លីងឱ្យស្ងួត (ដុតភ្លើងតិចៗ) ទើប ដួសដាក់ចានទុក។
4 លាងខ្ទះឱ្យស្អាត ចាក់ខ្លាញ់ទុកឱ្យក្ដៅ ដាក់ខ្ទឹមសចិញ្ច្រាំបំពងឱ្យឈ្ងុយ ហើយដាក់សាច់ជ្រូក ថ្លើមជ្រូក សាច់ក្រក ផ្សិតចំបើង ចាក់ទឹកត្រី ទឹកស៊ីអ៊ីវ ទឹកខ្មេះ ស្ករស ម្សៅស៊ុប ឆាត្រឡប់ចូលគ្នាឱ្យឆ្អិនទើបដាក់ខ្ទឹមបារាំង និងគល់ស្លឹកខ្ទឹមកូរចូលគ្នា ភ្លក្សមើលឱ្យល្មមដួសដាក់ចានទុក។
5 យកចានចង្កីះរាងមូលដាក់បាយលីងកន្លះចាន ហើយដួសសាច់ឆាដាក់កណ្ដាល រួចយកបាយលីងដាក់ពីលើញាត់ឱ្យណែន ទើបយកទៅផ្កាប់លើចានសំប៉ែត រៀបសាឡាដទ្រាប់ពីក្រោម គោះឱ្យធ្លាក់ពីក្នុងចាន (ប្រយ័ត្នកុំឱ្យបែក) ហើយរោយស៊ុតទា និងម្ទេសផ្លោកពីលើ រោយម្រេចបុក និងស្លឹកជីវ៉ាន់ស៊ុយថែមមួយជាន់ទៀត។
កុំភ្លេចសាកល្បងធ្វើទាំងអស់គ្នា!
Post a Comment