ឆា-សាក មីញាំហឹរ
មីមួយចាន មានសរសៃដ៏ទន់ស្វិត លាយឡំជាមួយសាច់ និងបន្លែជាច្រើនមុខ បង្កប់រសជាតិជាច្រើនបែប ដូចជា សាច់ជ្រូកចិញ្ច្រាំ ហតដក សាច់មឹក កញ្ឆែត ខ្ទឹមបារាំង ស្ពៃក្ដោបជាដើម ពិសេសទឹកកាពិឆា និងគ្រឿងតុងយ៉ាំ គូបផ្សំនិងរសជាតិហឹរ បានធ្វើឲ្យមីញាំមួយចានក្លាយជាអាហារមិនអាចបំភ្លេចបាន។
ភាគច្រើនយុវវ័យល្បីៗតគ្នា ថា មីញាំហឹរ គឺជាអាហាររបស់ប្រទេសថៃ ប៉ុន្តែបើតាមអ្នកស្រី ផន សុខា (ហៅបងថា) ម្ចាស់ហាងនេះ និងជាអ្នកច្នៃប្រឌិតអាហារនេះ បានឲ្យដឹងថា អ្នកស្រីធ្លាប់ទៅប្រទេសថៃមែន ប៉ុន្តែមីញ៉ាំរបស់ជនជាតិថៃ គ្រាន់តែដូចគ្នាត្រង់ហឹរប៉ុណ្ណោះ ចំណែកឯគ្រឿងផ្សំជាច្រើនមុខ ត្រូវបានអ្នកស្រីកែច្នៃបង្កើតដោយខ្លួនឯង ដូចជាកាពិឆា លាយគ្រឿងផ្សំមួយចំនួន ពិសេសគឺ គ្រឿងតុងយ៉ាំថ្មី ដែលមិនអាចរកបានខាងក្រៅពីហាងរបស់អ្នកស្រីទេ។
រយៈពេល២ឆ្នាំកន្លងមកនេះ មីញាំបានទទួលកេរ្តិ៍ឈ្មោះល្បីល្បាញ ពីសំណាកយុវវ័យមកពីគ្រប់ទិសទី ពិសេសនិស្សិតតែម្ដង ព្រោះរៀងរាល់ល្ងាចចាប់ពីម៉ោង៤រសៀលទៅ យុវវ័យទាំងក្រុមៗមកញ៉ាំ គឺសឹងតែរកកន្លែងអង្គុយគ្មាន។ បើតាមអ្នកស្រីម្ចាស់ហាង ក្នុង១ថ្ងៃ មានភ្ញៀវចន្លោះពី២០០ ទៅ៣០០នាក់ មកញ៉ាំមីញាំ ដោយចំនួននេះមិនបានគិតបញ្ចូលអ្នកដែលទិញខ្ចប់យកទៅផ្ទះឡើយ។
ក្រៅពីមីញាំ មិត្តយុវវ័យក៏អាចកុម្ម៉ង់ មីសួរញាំ ឬ នំបញ្ចុកញាំ ដែលមានរសជាតិឆ្ងាញ់ប្លែកៗ ពីគ្នាដែលមានតម្លៃចានតូច ៤០០០រៀល ចានកណ្ដាល៥០០០រៀល ចានធំ(ឌុបសាច់ ឌុបមី) ៧០០០រៀល ក្រៅពីនេះ ហាងបងថាមីញាំ ក៏មានលក់ តែបៃតង និងភេសជ្ជៈជាច្រើនមុខទៀតផងដែរ។
ហាងបងថា មីញ៉ាំ ស្ថិតនៅតាមបណ្ដោយផ្ទះលេខ ១៤១ ផ្លូវ ១៣៦ សង្កាត់ផ្សារកណ្ដាលទី២ ខណ្ឌដូនពេញ រាជធានីភ្នំពេញ ឬ អាចទាក់ទងទូរសព្ទ 012 833 994 /023 6600013៕
Post a Comment