ចៀន-នំគូឆាយ ទឹកត្រីជូរអែម
នំមួយដែលត្រូវបានចៀនឡើងក្រហមមានសម្បកស្រួយៗ សាច់នំទន់ស្វិត ជាមួយស្លឹកគូឆាយជាច្រើន យកទៅជ្រលក់ជាមួយទឹកត្រីជូរអែម ធ្វើឲ្យមិត្តយុវវ័យ ញ៉ាំអស់មួយគ្រាប់ហើយ ចង់ញ៉ាំថែមមួយគ្រាប់ថែមទៀតមិនខាន នោះគឺនំគូឆាយចៀន ដែលជាអាហារសម្រន់មួយបែប កំពុងពេញនិយមសម្រាប់មនុស្សគ្រប់វ័យ។
ចុងសប្ដាហ៏នេះ Sabay សូមណែនាំតូបនំគូឆាយ ហេង ហ៊ាង ដែលជាកន្លែងល្បីមានគូឆាយឆ្ងាញ់ និងតម្លៃសមរម្យ ឈជើងជាង២០ឆ្នាំ ព្រោះការផលិតផ្ចិតផ្ចង់ចេញពីអង្ករប្រភេទលេខ១ ធ្វើឲ្យផ្នែកខាងក្រៅសាច់នំស្រួយ និងខាងក្នុងស្វិត ហើយមានរសជាតិឆ្ងាញ់ជាប់មាត់តែម្ដង។
បើតាមម្ចាស់តូបនេះបានឲ្យដឹងថា គូឆាយរបស់គាត់ មិនត្រឹមផលិតលក់ផ្ទាល់ត្រឹម៤០០គ្រាប់ក្នុងមួយថ្ងៃនោះ គឺមានផលិតសម្រាប់បោះដុំឲ្យអ្នកលក់តាមហាងផ្សេងៗផងដែរ។ សព្វថ្ងៃនេះ គូឆាយលក់ក្នុងមួយគ្រាប់តម្លៃ១៥០០រៀល មាន៣ប្រភេទ គឺប្រភេទជ្រុង ផលិតឡើងដោយសាច់គូឆាយ និងបន្លែលាយចូលគ្នាជាសាច់មួយ ចំណែកគូឆាយមូលវិញ គឺសម្បកវាជាសាច់នំ ចំណែកឯស្នូល គឺជាបន្លែគូឆាយ ឬស្នូលប៉ិកគក់ប៉ុន្តែប្រភេទមូល គឺពេញនិយមខ្លាំងជាងគេ។
ក្រៅពីនេះ តូបនំគូឆាយហេង ហ៊ាង ក៏មានលក់លតឆា ទឹកដូងខ្ចី ញ៉ាំមិនឆាប់ទ្រលាន់ឡើយ ។ តូបនំគូឆាយហេង ហ៊ាង ស្ថិតផ្ទះលេខ ៤៦២ បណ្ដោយផ្លូវម៉ៅសេទុង (ចន្លោះពីស្តុបទេពផន ទៅស្តុបសន្ធរម៉ុក) ទល់មុខមន្ទីរសម្ភពវ៉ាន់នីដា សង្កាត់ទឹកល្អក់២ ខណ្ឌទួលគោករាជធានីភ្នំពេញ ឬអាចទំនាក់ទំនងទូរសព្ទលេខ ០១២ ៧៨ ៣០ ៩០/ ០៩៣ ៩០២ ៩០២ ។
Post a Comment