ចៀន-ត្រប់សណ្ដាយស្នូលសាច់ចិញ្ច្រាំ

ជាមួយគ្រឿងផ្សំងាយៗដូចត្រប់សណ្ដាយ ជីវក្រអូប ខ្ទឹមបារាំងសាច់ជ្រូក និងរបៀបចម្អិនសាមញ្ញៗ យើងជឿថាវាអាចជួយឱ្យបញ្ជីមុខម្ហូបប្រចាំគ្រួសារអ្នកកាន់តែសម្បូរ សម្រាប់ការទទួលបានដ៏ឆ្ងាញ់ពិសា។

ក-គ្រឿងផ្សំ

ត្រប់សណ្ដាយ២ផ្លែវែងៗសាច់ជ្រូកឬសាច់មាន់កិន២ខាំ ជីរក្រអូប៤-១០ស្លឹក ខ្ទឹមបារាំងមួយចំហៀង ទឹកត្រី អំបិល ម្សៅស៊ុបម្រេច ខ្ទឹមក្រហមហាន់តូចៗ ប្រេងឆា ជ្រក់ម្ទេស(ហូបតាមចិត្ដ)។

ខ-របៀបធ្វើ

-កាត់ត្រប់សណ្ដាយកង់ៗ៥សង់ទីម៉ែត្រ ត្រាំត្រប់ក្នុងទឹកអំបិលឡមៗប្រមាណជា១៥នាទី។

-កាត់ដុំត្រប់សណ្ដាយតែកុំឱ្យដាច់ពីគ្នា។

-ជីរក្រអូបហាន់តូចៗ ខ្ទឹមបារាំងចិញ្ច្រាំតូចៗ។

-សាច់ជ្រូកកិនលាយនិងជីរក្រអូប ខ្ទឹមក្រហមហាន់តូចៗលាយនិងម្រេចគ្រាប់ខ្លះៗ អំបិលមួយស្លាប់ព្រា ម្សៅស៊ុបកន្លះស្លាបព្រា ទឹកត្រីបីកូនស្លាបព្រាច្របល់លាយឱ្យសព្វសាច់។

-ប្រើស្លាបព្រាដួសល្បាយសាច់ចិញ្រ្ចាំ ញាត់ចូលកណ្ដាលកង់ត្រប់។ ត្រូវញាត់សាច់ឱ្យណែននិងច្រើន ត្បិតពេលចៀនសាច់និងស្វិតមកវិញ។

-ដាក់ប្រេងឆាឱ្យពុះក្នុងខ្ទះក្ដៅ ដាក់ត្រប់ស្នូលសាច់ ចូលម្ដងមួយកង់ៗ ហើយប្រើចង្កឹះត្រឡប់វាឱ្យល្អិតល្អ សព្វកន្លែង។

-ពេលត្រប់ឆ្អិនស្រង់ដាក់លើចានកំផ្លាតដែលមានទ្រាប់ក្រដាសសម្រាប់ យកប្រេង។ បើអាចអ្នកអាចអាំងត្រប់ក្នុងកម្ដៅឱ្យក្ដៅ២០ទៅ២៥នាទីជំនួសការចៀន ក៏បាន។

-តម្រៀបលើចានជ្រលោះ និងម្ទេសជ្រក់ហូបនិងបាយស។