ឆា-មាន់ឆារសជាតិកូកាកូឡា
បុគ្គលិកល្មុតទុំបង្ហាញម្ហូបមាន់ឆាប្រៃផ្អែមកូកា។
ភ្នំពេញៈ ជម្រាបសួរ! មិត្តអ្នកអានជាទីមេត្រី សប្ដាហ៍នេះ ភ្នំពេញ ប៉ុស្ដិ៍សូមនាំលោកអ្នកទៅ ភោជនីយដ្ឋានល្មុតទុំ ដើម្បីបង្ហាញនូវវិធីធ្វើម្ហូបសាមញ្ញមួយមុខដែលលោកអ្នកនឹងសរសើរ មិនដាច់ពីមាត់ថា ឆ្ងាញ់ជាមិនខាន។ នោះគឺមាន់ឆាប្រៃផ្អែមកូកា ដែលអាចទទួលទានជាមួយបាយ ឬប្រើជាម្ហូបក្លែមឲ្យផ្អែមមាត់ក៏បាន។
ដោយសារតែមុខម្ហូបនេះមិនតម្រូវឲ្យមានគ្រឿងផ្សំអ្វីស្មុគ ស្មាញលោកអ្នកក៏អាចស្វែងយល់ពីវិធីធ្វើងាយៗដូចខាងក្រោម ដើម្បីសាកល្បងចម្អិនឲ្យក្រុមគ្រួសារបានភ្លក្សស្នាដៃដ៏ឆ្ងាញ់ ពិសារបស់លោកអ្នកផងដែរ។
គឿងផ្សំ : សាច់មាន់ ឃិនឆាយ ខ្ទឹមស ម្ទេស សាលាដ ប្រេងឆា ប្រេងខ្យង ស្លឹកគ្រៃ ស្ករស ប៊ីចេង អំបិល ទឹកត្រី និងទឹកក្រូចកូកាកូឡា។
វិធីចម្អិន : ដំបូងត្រូវយកសាច់មាន់ទៅលាង រួចកាត់ជាកូនដុំតូចៗទុកឲ្យស្រស់ទឹក។ បន្ទាប់មកត្រូវដាក់ប្រេងក្នុងខ្ទះ ហើយបំពងខ្ទឹមសចិញ្ច្រាំចូលឲ្យឈ្ងុយ រួចសឹមចាក់សាច់មាន់ចូលរំលីងឲ្យឆ្អិនក្រៀមល្មម។
ចាប់ផ្ដើមដាក់គ្រឿងផ្សំរសជាតិ ដូចជាប្រេងខ្យង ស្ករស ប៊ីចេង អំបិល និងទឹកត្រីក្នុងបរិមាណតិចតួចបំផុតមុននឹងចាក់ទឹកក្រូចកូកាកូឡា ចូលប្រមាណ២-៣ស្លាបព្រា។
ដំណាក់កាលចុងក្រោយ បន្ថែមម្ទេស និងស្លឹកគ្រៃបន្តិច រួចដួសដាក់ចានដែលមានទ្រាប់សាលាដ មុននឹងរោយស្លឹកឃិនឆាយឲ្យមានក្លិនឈ្ងុយនោះជាការស្រេច។
បើមិនសូវមានពេលទំនេរចូលផ្ទះបាយចម្អិនដោយខ្លួនឯងនោះ លោកអ្នកក៏អាចទៅទទួលទានអាហារមាន់ឆាប្រៃផ្អែមកូកានេះនៅ ភោជនីយដ្ឋានល្មុតទុំ ដែលស្ថិតនៅផ្ទះលេខ១៩ផ្លូវលេខ៩៥ កែងផ្លូវ៣៨៦ សង្កាត់បឹងកេងកង៣ ខណ្ឌចម្ការមន ឬទាក់ទងទូរស័ព្ទលេខ០១២ ៧៥ ៩០ ៩៥៕
Post a Comment