ឆា-អណ្តាតជ្រូកឆាលឹកគ្រៃ និង ម្ទេស
អណ្តាតជ្រូកស្រួយៗ ឆានិងស្លឹកគ្រៃ បន្ថែមដោយជាតិហឹររបស់ម្ទេស ប្រើជាគ្រឿងក្លែមក៏ឆ្ងាញ់ ហូបនិងបាយក៏បាន។
ក.គ្រឿងផ្សំ
អណ្តាតជ្រូកមួយ ស្លឹកគ្រៃបុក ១/៤ ចាន អំបិល ម្សៅស៊ុប ប៊ីចេង ទឹកត្រី ស្លឹកខ្ទឹម ជីរក្រអូប ទឹកខ្មះ ខ្ទឹមស ម្ទេស។
ខ.របៀបធ្វើ
ជំហានទី១
-អណ្តាតជ្រូកលាងឱ្យស្អាត ដាក់ចូលឆ្នាំទឹកពុះ បង់ទឹកខ្មេះមួយកូនស្លាបព្រា ស្ងោរស្ទើរឆ្អិនប្រមាណ ៥ នាទី។
-ដាក់ស្លឹកគ្រៃបុកចូលចាន ម្ទេសហាន់តូច។
ជំហានទី២
-លាងអណ្តាតជ្រូកដែលស្ងោររួចឱ្យស្អាត កោសកំអែលសៗខាងក្រោមអណ្តាតឱ្យស្អាត លាងម្តងទៀត ទុកឱ្យស្រក់ទឹកអស់ ហើយហាន់តូចៗល្មមហូប។
ជំហានទី៣
ដាក់ប្រេងឆាឱ្យពុះលើខ្ទះ លីងខ្ទឹមសឱ្យឈ្ងុយ តមកដាក់ល្បាយស្លឹកគ្រៃ ម្ទេសចូលឆាឱ្យក្រអួប។
ជំហានទី៤
ដាក់អណ្តាតជ្រូកចូលបណ្តើរៗ ឆាជាមួយគ្នា ដាក់អំបិលមួយចិប ទឹកត្រីបន្តិច ម្សៅស៊ុប ប៊ីចេង លៃគ្រឿងឱ្យល្មមមាត់ ឆាចុះឡើងឱ្យសព្វប្រមាណ ១០ នាទីគឺបានពន្លត់ភ្លើងដាក់ខ្ទឹមស្លឹក និង ជីរក្រអូបចូលជាការស្រេច៕
Post a Comment