សម្ល-បាយការីគោកសាច់មាន់
បាយការីគោកសាច់មាន់ នៅភោជនីយដ្ឋានឌីប្លូផាំឃីន
ភ្នំពេញ : ហាងឌីប៊្លូផាំឃីន ដែលពីមុនធ្លាប់ជាហាងដុតនំធ្វើនំនិងជាហាងការ៉េមនោះទើបតែ សម្ពោធសាខាថ្មីរបស់ខ្លួនក្រោមរូបភាពជាហាងនំផង និងភោជនីយដ្ឋានផង។
នៅភោជនីយដ្ឋានថ្មីនេះ បញ្ជីរាយនាមអាហារក៏មានមុខម្ហូបអាស៊ីដូចជាខ្មែរ ចិន វៀតណាម និងអាហារបស្ចិមប្រទេសបែបអ៊ីតាលី និងបារាំង ជាដើម។
ក្រៅពីម្ហូបអាហារ ឌីប៊្លូផាំឃីន សាខាថ្មីក៏មានលក់ភេសជ្ជៈ និងស្រាក្រឡុកសម្រាប់ទទួលទានអមជាមួយនឹងអាហារទាំង៣ពេលផងដែរ។
ក្នុងចំណោមមុខម្ហូបថ្មីៗជាច្រើន បាយការីគោកសាច់មាន់ គឺជាប្រភេទអាហារអាស៊ី ដែលស័ក្ដិសមសម្រាប់ទទួលទាននាពេលអាហារថ្ងៃត្រង់។
អាហារនេះរួមមានបាយ និងម្ហូបដែលគេឆាសាច់មាន់ជាមួយម្ទេសហាវ៉ៃ ម្នាស់ ប៉េងប៉ោះ ស្លឹកខ្ទឹម ជាមួយគ្រឿងការី។ អាហារនេះមានលក្ខណៈប្លែកពីការីទូទៅ ទាំងក្លិន និងរសជាតិតែម្ដង។
បាយការីគោកសាច់មាន់នេះក៏មិនខុសពីអាហារដទៃដែរគឺត្រូវបានលក់ក្នុងតម្លៃប្រមាណជា៥ដុល្លារ។
លោក ទ្រីស្តាន អគ្គនាយករបស់ឌីប៊្លូផាំឃីន បាននិយាយថា ហាងរបស់លោកមានគោលការណ៍សំខាន់ៗផ្ដោតទៅលើការបម្រើអាហារស្រស់ៗ ក្នុងបរិយាកាសទទួលទានពណ៌សក្បុស ស្រស់ថ្លា ជាមួយនឹងតម្លៃដូចមុន។
លោកបានមានប្រសាសន៍ទៀតថា៖ «ហាងនេះបើកដំបូងក្នុងឆ្នាំ២០០០នៅខេត្តសៀមរាបដែលមានចុងភៅធ្វើ នំដ៏ល្បីគឺលោក អាណូត ឃឺថាត និងភរិយារបស់គាត់ជាមេចុងភៅឈ្មោះ ហ្ស៊ូ»។
ជាមួយនឹងភាពជោគជ័យ ឌីប៊្លូផាំឃីនបានបើកសាខាជាច្រើននៅសៀមរាបនិងរាជធានីភ្នំពេញដូច ជានៅផ្លូវព្រះស៊ីសុវត្ថិ ហាងសៀវភៅម៉ូញូវមេនប៊ុក អាកាសយានដ្ឋានម្ដុំផ្សារទួលគោកនិងសង្កាត់បឹងកេងកង។
លោកបានឲ្យដឹងផងដែរថា ឌីប៊្លូផាំឃីន ក៏មានគម្រោងបើកបន្ថែមនៅបណ្ដាខេត្តនានាដូចជាកំពង់ចាម។ សាខាឌីប៊្លូផាំឃីនដែលទើបបើកថ្មីនេះមានទីតាំងស្ថិតនៅសង្កាត់បឹង កេងកង១ កែងផ្លូវលេខ៥៧៕
Post a Comment